حرص عدد من نجوم الفن والغناء على دعم النجمة شيرين عبد الوهاب، أمام الانتقادات القاسية التي تعرضت لها في الساعات الماضية، على خلفية أدائها بعض الأغاني بطريقة playback خلال حفلها الغنائى في مهرجان موازين بالمغرب، ليس ذلك فقط بل تم انتقادها أيضًا على طريقتها في الغناء والإطلالة التي ظهرت بها على المسرح بعد غياب.
فحرص على دعم شيرين النجمة نوال الزغبي عبر حسابها × معلقة "سلامة قلبك كنت حاسة فيكي قدّيش مشتاقة للمسرح ولجمهورك الكبير وقدّيش كنت تعبانة نفسيًا وجسديًا ومع هيك جمهورك بيحبك ورح يضل حدّك ودايما بقول صوت لن يتكرر.. كلنا منحبك وحدّك".
وحرصت النجمة غادة عبد الرازق على مساندتها قائلة عبر حسابها انستجرام بستوري "مليون سلامة عليكي حبيبتى ونورتى المهرجان، بنحبك يا موهبة ماشية على الأرض القافلة تسير".
وكتب الشاعر تامر حسين عبر حسابه × "تفتكروا شيرين عبد الوهاب ما تستحقش تظهر بأجمل وأكمل شكل شكلاً ومضموناً؟ واضح أن صوتها كان مُرهق أو مُجهد، ورغم كده بترجع وبتحاول وبتعافر ومهتمة وواحشها تقابل الجمهور وترجع لمكانها ومتعتها ورونقها على المسرح، ومن حق الجمهور يسمعها بأفضل شكل يشجيه ويرضيه".
وأضاف: "بلاش انتقادات قاسية وتطاول غير مبرر، دي بني آدمة وبتحس، واللي بيتقال من بعض الناس ده يسد نفس أي مطرب عن الغُنا تاني ، ياريت ما ننساش إنها صوت عظيم وياما أمتعتنا، ونراعي مشاعر الناس.
وتابع " شيرين مرت بظروف في منتهى الصعوبة ممكن تهد وتنهي حياة بني آدمين، فشوية إنسانية ورحمة لوجه الله فقط. الكلمة الطيبة صدقة، ما بقولكش نافق بس خليك إنسان".
وعلقت الفنانة شيماء سيف قائلة : "شيرين حبيبتى النجمة صاحبة الصوت الرائع أنا اخترت لها الفيديو ده اللي هى غلطت فيه فى الكلمات وما شاء الله تداركت الموقف فى لحظة وده عشان بس يبان انها مش بتغني بلاى باك. وحتى لو هي غنت أول اغنية مع بداية دخولها المفروض منجلدهاش كدا، بالعكس عادي اعتبروها متوترة لأنها بقالها كتير مقابلتش جمهورها وبتشجع نفسها لكن احنا بقينا قاسيين أوي أوي".
وأضافت شيماء سيف: "أرجوكم كفاية حتى لو حد غلط اسكتوا، مش لازم كله يبقى ناقد فنى وصاحب رأي وعبقرينو، كلنا لينا وقعات وزلات ومش ماشيين غير بستر ربنا. ودى نجمة المفروض نفتخر بيها ونشجعها ترجع وبقوة، مش نكرهها فى عيشتها، وياريت مننساش شيرين يعنى مشاعر يعنى عودتني الدنيا يعنى طريقي يعنى اه ياليل يعنى ويعنى ويعنى، بحبك ياشوشو يانجمة كبيرة".