قال الفريق كامل الوزير وزير النقل والصناعة ونائب رئيس الوزراء للتنمية الصناعية، إن الطريق الاقليمي يتم تطويره وفق مخطط واضح، مضيفًا: لن يتم تطوير قطاع في الطريق إلا بعد الانتهاء من التطوير القائم حاليًا.
وأضاف الوزير خلال بث مباشر مع الاعلامي نشأت الديهي مقدم برنامج بالورقة والقلم، وزارة النقل وادارة المرور والهيئة العامة للطرق والكباري والشركات المنفذة نؤكد على اتباع كل الأصول الفنية في تأمين مستخدمي الطريق، نظرًا لأن من يمرون عليه هم أسرنا.. وأرواح ناس أبرياء راحوا .. لذلك بنقول لكل السائقين لو سمحتوا اتبعوا آداب المرور.
وتابع: أحنا بنستنفذ كل الطرق اللي هنسميها السلمية والتربوية و المعنوية معاهم وهنعمل مؤتمر الأسبوع ده .. رئيس الوزراء سافر أسبانيا وهيرجع نعمل المؤتمر على مستوى عالي لكل الجهات المعنية.
وتابع: المؤتمر سيعقبه ندوة للسلامة على الطرق ووسائل المواصلات زي ما بتتعمل في السويد زي الناس المتقدمة اللي مش عندها حوادث وهيحضرها طلبة المدارس والجامعات ومراكز الشباب .. هنتكلم مع بعض ولازم نتكلم مع بعض وهنفهم بالقانون ازاي يحافظوا على مكتسبات الدولة بتاعتهم.
واستكمل وزير النقل قوله: أحنا بنتكلم في الأول بالحسنى وبعد كده هيكون في تطبيق للقانون بمنتهي الحزم و الشدة .. والقانون هياخد مجراه .. وهيتم تطبيقه على الحادثة دي .. وكل من أخطأ هيتحاسب.. وكلنا جاهزين نتحاسب ومفيش حد فوق الحساب.
وأضاف: أنا كنت في زيارة مهمة جدًا مكنتش مسافر اتفسح ولا حاجة .. كنت في أهم مؤتمر للترابط والنقل العالمي في تركيا وكان عندي لقاءات مع وزراء النقل في أوروبا وأفريقيا وكلنا كنا بنحضر هذا المنتدي الذي له تأثيرات هامة على كافة قطاعات النقل في مصر .. والاتفاقيات التي تحتاج الى صياغة خاصة مع الدول الاوروبية وتركيا والأفريقية.
وأوضح الوزير، أن تفاصيل حادثة أشمون أن عربية مملوكة لأحد المواطنين في السنبلاوين مركبها لسواق معهوش رخصة وزمايلنا في الداخلية والنيابة عملوا تحاليل له وطلعت النتيجة إيجابية يعني شارب مخدرات و مش معاه رخصة ومش هنسيبه ولا هنسيب صاحب العربية برضه .. هنرجع بالقانون على صاحب العربية نفسه ونطالبه بالتعويض.