حرص النجم تامر حسني على توجيه شكر كبير لجمهوره لمساندته في محنته الحالية بتعرض نجله " آدم" لأزمة صحية كبيرة أدت لاجراؤه عمليتين جراحتين باحدى المستشفيات ، كما حرص أيضا تامر على طمأنتهم على صحة ابنه آدم وتقديم النصيحة لهم حتى لايتعرض أي طفل لما تعرض له ابنه اليومين الماضيين ، وقام بكشف تفاصيل الأزمة الصحية التي تعرض لها .
فكتب تامر حسني عبر حسابه الرسمي انستجرام منذ قليل " "أنا مش عارف أشكركم إزاي على كمّ الدعوات اللي دعيتوها لربنا لشفاء آدم ابني اللي جاتلي منكم هنا وعلى تليفوني وتليفونات كل المحيطين بيا هو عمل عمليتين كبار بسبب انفجار الزايدة المفاجئ، اللي كانت أعراضه سخونية عادية بس، وبقولكم كده عشان تبقوا حريصين مع نفسكم أكتر وولادكم".
وأضاف " ومش كل سخونية تقولوا ده شوية برد، وخلاص لا روحوا اكشفوا كويس واعملوا سونار على البطن والزايدة مرة و2 عشان برضو ساعات مش بيبان ولازم الدكتور يضغط بطريقة معيّنة، تقريباً أقوى شوية عشان يعرف، لإني سمعت كتير اليومين دول إن الزايدة خادعة، اطمنوا كذا مرة قبل لحظة انفجارها عشان بجد مشاكل بتحصل بعدها كبيرة ومحزنة أوي".
وتابع تامر حسني قائلا "وحبيبي آدم عمل عمليتين صعبين أوي عليه وبدعواتكم مستنيين النتايج تكون خير يارب ويعدي مرحلة الخطر"، داعيا لابنه قائلا: يارب، بحق كن فيكون اشفيه وعافيه، هو وكل ولادنا، بس هو راجل وهيتحمل وإن شاء الله ربنا يكرمه ويعافيه ويحفظه هو وإخواته ويحفظ كل ولادكم يارب".
اختتم " وأحب أقول تاني شكراً من كل قلبي على دعواتكم، أنا شايف قلب كل حد فيكم وهو بيدعي بصدق، متشكر أوي يا جماعة شكراً لكل اللي اهتم وسأل عن ابني ودعاله هنا أو على التليفون، واللي طلعوله صدقات لشفائه من غير ما يعرفونا شخصياً، أنا مش لاقي كلام أشكركم بيه و أنا برضو بدعيلكم، وبقول لكم مثلها وأضعاف أضعافها، وربنا يحفظكم ويحفظ أولادكم قادر يا كريم.
حيث نقل آدم نجل النجم تامر حسني لاحدى المستشفيات بالقاهرة ، بعد تعرضه لأزمة صحية مفاجئة وطالبت والدته الفنانة المغربية بسمة بوسيل الجمهور بالدعاء له بالشفاء عبر حسابها الرسمي " انستجرام" .